Bowil Zytig Nr. 194 | Mai 2021

Bowil Zytig Mitteilungsblatt der Gemeinde 3533 Bowil 34. Jahrgang / Ausgabe Nr. 194 vom Mai 2021 Liebii Bowilerinnen u Bowiler Vor langer Zyt, i bi no ir Stifti gsy, het dr Turnverein ä Fähndrich brucht. Chly trinkfescht sött är sy. Bini, hani gfunge u JA gseit. 2 Mönet später bini mit dr Vereinsfahne voräme Grab gstange u ha mit äm Fahnegruäss ds letschte Gleit fürnä Vereinskolleg gäh. Mi erschti Amtshandlig. Vo däm het vorhär niemer gred. Aber irgendwie isch o das gange. Mi Vorvorvorgänger aus Fähndrich het mir ä churze Ungerrycht gäh, vorhär. Syt den isch’s mir öpe die no ähnlech gange. Aber mä cha a däm o wachse u drvo lehre. Letschte Dezämber bini gfragt worde ob i würd Gmeindrat mache, äs syg nid so ä Sach u bruch chly Zyt, het’s gheisse. Macheni, hani dänkt u JA gseit. Äs isch oscho ds eint oder angere cho wo vorhär niemer het gseit. I hoffe i chönn drus lehrä u drann wachse. I füehle mi o nid elei gla, mir wird ghufä syg’s vo mine AmtskollegInne, dä Kommissions- mitglieder oder är Verwautig. Merci drfür. Üses System besteit us Lüt wo sich freiwiuig für d’Augemeinheit ysetze. Syg’s imene Vereinsvor- schtang oder imene öffentleche Amt. Doch immer meh suecht mä vergäbens nach Lüt für au die Ämtli u Pöschteli. Zum Bispiu het dr Verein no Nachwuchs aber ä TrainerIn für nä z’trainiere z’finge wird scho schwär oder Mitglieder sy no da aber öper wo wet Byträg yzieh u d’Kasse verwaute z’finge, unmüglech. Fasch no schwieriger isch es Lüt für Regionauverbäng u so z’finge. O we Gmeinde Lüt füre Rat oder Kommissione sueche, wird’s schwierig. Keh Zyt oder das cha i nid, ghöre die wo aafrage am meischte. Aber mit chly Muet cha mä no viu u süsch wird eim zum Start gärn ghufä. Äs isch no ke Meischter vom Himmu gheit. Aber mä chönnt viu lehrä, wem ä mau JA seit. I hoffe äs glingt dir dä Text z’entziffere u z’verschtah. Ja o das Schrybe vor Titusyte ir Bowiuzytig isch nid so mis, aber äs ghör drzue, het mä mir gseit. I has yts probiert u hoffe füre Aafang göngs u äbe, drus lehrä u sech verbessäre isch ds Ziu. Wet ds nächscht mau für so nä Herusforderig aagfragt wirsch, muesch nid z’lang überlege u JA säge u drbi lehrä. Zäme geit das u we aui öpis häufe u mache no viu besser. Äs grosses Merci a aui die wo scho mau JA hei gseit u irgend so öpis mache u dass sie, we sie de mau wei höre, o öper finge wo wieder JA seit. Patric Brechbühl, Brüegg